«Վերածնունդ» մշակութային և ինտելեկտուալ հիմնադրամի կամավորները օժանդակում են հայկական ժառանգության պահպանմանը, զարգացմանը և տարածմանը: Մեր նախագծերի կարևոր առաքելություններից է՝ նորովի բացել հայկական ավանդական մշակույթի էջերը և ցույց տալ մեր ժամանակի մարդուն, որ այդ էջերը այժմ էլ արդի են: Այս ողջ գործընթացում մեզ համար հիմնաքար են հանդիսանում ստեղծագործ միտք ունեցող և իրենց ներուժը մշակույթի ոլորտի զարգացման մեջ ներդնել ցանկացող երիտասարդները:
Գտնվելով ստեղծարար մթնոլորտում՝ մարդիկ աճում են ավելի, քան երբևէ, քանի որ հենց այս մթնոլորտում է զարգանում մարդու այլընտրանքային, քննադատողական միտքը, հենց այստեղ է մարդը ներշնչվում, ձգտում կերտել: Հիմնադրամը հնարավորություն է տալիս լինել այս ամենի կիզակետում, շփվել ամենատարբեր ոլորտների ներկայացուցիչների հետ, փոխանակվել գաղափարներով, ստեղծել նորերը, զարգացնել իրենց մասնագիտական հմտությունները:
